العيد وقروش الحديد
اهداء الى اخي العزيز الكاتب منصور الصلبوخ
والى ابن اختي محمد حسن آل ليث
شعر والقاء الاديب الاستاذ علي المصطفى
تمنينا نرد اطفال
ونحظى باعلى عيديه
صغار كنا مع لهلال
ننال اقروش حديديه
ولكن كانت الفرحه
صراحه كم حقيقيه
هذا بياع يناظرنا
ومثله يحمل النيه
وعلى شروه كما حلمه
تكون اريال مو اميه
وعندما نفتح اليدين
تكون احلامه وهميه
ويبقى شي أحسن من
بلا يدين تكون فاضيه
ويبقى ابحيرته ايقلب
في بيعاته علانيه
الين ايلاقي شي يفرح
تكون الضحكه عطريه
يمد يده وناخذها
بفرحه اتعادل الدنيا
تجي الجده مع الدسمال
رباطه ابزاويه وحده
وتحضنا بفرحه اتزيد
وتشعر يدنا ممتده
تفك الربطه وتردد
أكيد تبغونها خرده
تراني مو مثل جدكم
ترى جدكم غني حده
وناخذ منها المقسوم
تكون اقروش كا العاده
وجدنا عينه اتناظر
وضحكه اتبان من جده
انا باشوف كم تعطين
بسبابه وبهام يده
وهي اتناقزه ابكلمه
ترى النيطان هي عنده
يجاوبها وهو يضحك
يا انتي الخير يا سعده
تعالوا عندي احفادي
تعالوا اخذوا عيديه
يمد يده وناخذها
بفرحه اتعادل الدنيا
هذي عيدية في الاول
ما ننساها وتفرحنا
تكون نيطان بالألوان
تكون اقروش لها رنه
واما ابياعة الاحباب
تكون مفروشه في قرنه
بعضهم بوري او لعبه
وبيانو اصغير يدندنا
وبعضهم منفخه وبوري
ما نشعر صوته يزعجنا
وعرايس تشبه ابنيه
شكلها ما نعرفه احنا
يفرحوا فيها لبنيات
وفكرهم يختلف عنا
وهذي تقعد اترضع
مع التمشيط والحنه
وثيابنا يا حلاها كان
تشوف الوان بتتغنى
وبنات ابيلبسوا بخنق
على النفنوف يا حسنه
وبنات ابيلبسوا مشمر
يكون اشموع مضويه
ويبقى العيد لنا فرحه
وفرحه اتعادل الدنيا
تعليقات
إرسال تعليق