شعر والقاء الاديب الاستاذ علي المصطفى
يا حلاهم يا حلاهم
يوم ما يبدا عملهم
يا فرحهم
في وسط سيفه بفرحه ويا فرحهم
والموادع بين أفراح و حزن
والموادع يعرفه أهل السفن
ناره نار تآكل بقسوه في البدن
لكن العيشه تتطلب من ديون تبدي النداء
من ديون اشقد عليهم دين يحتاج الوفاء
والعمل فيه الدواء
هذا متسلف مقاضي هذا متسلف ايجار
وهذا اصغيره بيحتاج يا مصاريف الصغار
والحلم اتكون دانات تختفي وسط المحار
وتلتقي الايدي الى رب السماء
ترتفع في كل محبه
ترتفع في كل رجاء
والجميع يحلم برده واستجابه للدعاء
وتبتدي الرحله بموسم والمواسم للعطاء
والجميع يدعوا اليهم دعوه من داخل قلبهم
يرجعوا امحقق املهم يرجعوا امحقق حلمهم
يا حلاهم يا حلاهم
موسم الغوص أحلى فرحه موسمه يحمل أمال
والرجال لو قالوا كلمه الكلام قوة فعال
والفرح يبهج الخاطر يوم تحقيق المحال
آه يا رحله شهور والشهور مثل الدهور
ما يعرفوا إلا عملهم ما يعرفون البخور
ويكتفوا بريحة بحرنا و ريحته أغلى العطور
وما يفكروا غير عطوه دانه تهديهم سرور
ويبقى انهارهم في غيص من بعد تمرة فطور
والعشا خير الله راهي والجميع يبدوا الشكور
أما نهامهم يا صوته تنشرح فيه الصدور
من يسمعونه عطاهم بالعمل كلهم فخور
هذا في مجدافه جاهز هذا في قوته معتز
ونوخذاهم دوم بارز وللخطر ما يكون عاجز
الجميع يسمع كلامه ومن بيختاره بيعتز
والعطا قوة عطاهم يا حلاهم يا حلاهم
هذا غيص يا زين زينه و( الديين) ا تثبته يدينه
حتى يوضع فيه محار ما يطمن به حنينه
وهذا سيب ماسك احباله في يساره وفي يمينه
من توصله الأشاره يسحب الغيص في فنونه
وهذا للتفليق جالس فرحة الدانه في عينه
والمحار ما بين يده كالذهب فوف السفينه
اما نهامهم في صوته يخفي عن عمره سنينه
قوه تحمل في عطاها للجميع في مد يمينه
ونوخذاهم فكر يعطي والفكر ما هو لزينه
فكره في حل المشاكل حتى لو كانت الشينه
فيها يحتاج التصر ف حتى لو ما تكون هينه
وعينه بالطواش تحلم يشتري الدان الثمينه
والذي يقدر تعبهم يا حلاهم يا حلاهم
رحلة الغوص ابخطرها تنتهي بقفال مسعد
يوم توجيه السفينه في فرح صوب البلد
ويلتقي في السيف زحمه للأهل وابن الولد
أربعة أشهر في غربه وخامس الأشهر وصل
ومن يبان لون السفينه اتبان فرحه للأهل
اما من كان فاقدينه دمعة الحرقه تهل
وأما من كان شايفنه بسمة الفرحه تطل
والسلام يحمل ختام قصة الغيص البطل
في زمن عاشوه بقسوه في زمن حب العمل
تعليقات
إرسال تعليق