عيد الاضحى والدوخله
شعر والقاء الاديب الاستاذ علي المصطفى
يا عيد اضحى يا كل فرحه
على انوارك ابنصحه
إلك اقلوبنا تهدف
يا عيد انواره من صبحه
تذكرنا بفريضه حج
ومن أداها يا ربحه
وكمال اركان بها دينه
وشفايف دايم امسبحه
ترجعنا لذكرى الخير
ومن حب ارضه يا صلحه
وذكرى الدوخله رنان
وحلاته دوم في شرحه
يا عشق الدوخله عشناه
ابطفوله وحب عايشناه
اذا والدنا او عمنا
نوى للحج يبادي اخطاه
يكون للدوخله قصه
نعيش فيها بما نرضاه
ونرعاها بحب اكبير
وهذا الحب كبير معناه
بيصنعها لنا الفنان
ويهديها وفا يمناه
وناخذها الى ابيوتنا
بعد ما القيمه اعطيناه
بيصنعها بخوص انخيل
بفن وذوق عليه الله
ونتابعها في وسط البيت
وتراب الارض حطيناه
ومن ثم السماد وبذور
وعليها اعيوننا امفتحه
بنسيقيها ونراعيها ونهديها
وقتنا وتبقى كل غالي
ونقارن غيبة الحجاج
بنبت العود للعالي
ونتذكر قرايبنا في حجتهم
وحفظ الله لهم عالي
وجمال كانت بتحملهم
ونجوم الليل بتلالي
تنير الصحرا في المسرى
بخطوة جد مو تالي
وعند اوصولهم للبيت
يكون زمزم حلا حالي
وتلقى الصوت في ايمان
يا ربي اقبل اعمالي
وكل منا بحب يهتف
يا ربنا حقق امالي
وكل ما الدوخله تخضر
نكون اقلوب منشرحه
ويوم العيد في عصره
بنتجمع اهل واخوان
وقرايب في وسط فرحه
وحتى معنا الجيران
وتبقى الدوخله شعله
وترديده في كل السان
الين عند البحر نوصل
وتبقى بالذكر رنان
نطوحها بكل فرحه
وتبقى للفرح عنوان
دوخلتي دوخلتي حجي بي
الين يجي الين يجي حبيبي
ويحضنها بحر حبنا
بكل طيبه وتسعدنا
وتبقى بمنظر المبهر
نوادعها ابفرح يظهر
ونترجا رجوع حجاج
ويحلا فيهم المنظر
ويوم العيد ياكل فرحه
تعليقات
إرسال تعليق