جدنا و جدتنا والعيد
شعر والقاء الاديب الاستاذ علي المصطفى
اذا هل الهلال فرحه
وبستقبل هلا ومرحب
تكون لبيوت من صبحه
عطور وقدومه الاطيب
صغار اكبار فيه تصحى
وكلام في طيبه امحبب
تكون الام بكل سمحه
ويكون الاب حنان الاب
بفرحة عيد لا تمحى
ونبارك من صميم القلب
بخير اكثير من الله
جميع الاسره تتجمع
وتكون الفرحه في لوجوه
كما شمسه ابضياء تلمع
تسامح طيب والالفه
ويا اجمل كلام تسمع
لطافه ما بيكفي الوصف
يقال في وقته الاسرع
يخزنه عقلك وتبقيه
وحفظه يكون لك مطمع
تحس بعض الكلام غالي
وحتى من امن الذهب ارفع
صحيح عيديته تحلا
وحلاها رحله في مركب
ونبارك من صميم القلب
نبادي ازيارة الجده مع جدنا
يشعرونا بمحبتهم كما الجنه
في وسط احضانهم لمه
و صدرهم يكمل الحضنه
يشعرونا بعدنا اصغار
واحنا نهتف اكبرنا
يردوا لالا ما كبرتوا
وابوكم في صغر سنه
ويعطونا لعب اطفال
وعيد يه في كثرتها تفرحنا
نقول اكفايه الالعاب
يقولوا الخير من ربنا
زيارتكم تخلي البيت
وتخلينا نحس حبنا
في وسط اقلوبكم اكبير
وفيها اقلوبنا ترغب
ونبارك من صميم القلب
يجوا الاعمام مع العمات
وتزيد الفرحه في الاثبات
يكون البيت مثل أول
يكون البيت غلا الدانات
ويجلس جدنا المحبوب
يسولف لينا عن عادات
وكيف كانت بيوت اول
تضم الابناء والزوجات
وهذي اغرف الى الاعمام
وهذي غرفة الجلسات
وهذي اغرف الى العمات
الين اتنال من الفرحات
بزوج يسعدها وتهنيه
وطيبتنا بها الاثبات
والحين للصلاه قوموا
وبعدها الاكل الغذوات
نفز لمحبة الخالق
وما خاب من يطيع الرب
ونبارك من صميم القلب
ومن بعد الغذا الجده
تجينا لابسه ارده
وملفع في زري منقوش
يقولوا عنها النغدا
تسولف لينا احكايات
سوالف تحلا في القعده
عن الماضي وكيف عاشوا
وكل منهم يحس سعده
وبعدين تفتح الدسمال
وفيه الربطه مشتده
تراوينا قروش اول
وكل منا يمد يده
تقول لا بس شوفهم
وذكروا فيهم الجده
وتطلع محفظه احليوه
وتفتحها بلا حده
وتطلع منها الاعياد
وكل منا إله عيده
ويمر اليوم في فرحه
يا زينه حتى المغرب
ونبارك من صميم القلب
تعليقات
إرسال تعليق