شعر والقاء الاديب الاستاذ علي المصطفى
كل شي زمان ماله مثيل وبصدق نتحسر عليه وها الوقت ما يشوفوه جميل
ويقولوا تتحسر لويه شوف التقدم مو قليل
ويا بخت من فتح عينيه قولوا شقول غير الصلاة على الرسول
ونوصف بحب كل الذي نشتاق اليه يمكن صحيح ابننغلب
و نشوف ما انتونا فيه ويبقى السؤال واضح جميل
هل انتم ابراحه جذيه وقبل الردود نصبر قليل
ونقارن ابما نبتديه
ونذكر زمان يا آه يا حسره عليه
كانت ليالينا قبل
فرحه وتباشير الامل
الأسره مجتمعه في ليل
واللمه بالفرحه تطل
يبقى المريض يشعر شفاء
ويشوف من حوله الاهل
ويلقى اللي يعمل راحته
مع اسرته قول وفعل
حتى الصغار يتعلموا
في بهجه ما يحب الطفل النطق مع اطيب سلوك
وكيف الرضيع ابينحمل
هذا امجرد شي بسيط
وبعضكم ايقول ما عليه
ونذكر زمان يا آه يا حسره عليه
البعض منكم ابتهج ويحب يعرف الكثير
اما بعضكم راح يقول هذي تخاريف الكبير
وانا أقول هذا صحيح
مثل خراريف ماضي غير
اليوم نرويها بشوق
وبكل محبة وبسرور
عن ماضي عشناه ابسعاده
والسعاده كل خير
نرجع ونتذكر بعد
اشلون مصروفنا صغير
يهديه ابونا ونشعره
وردة بمحبه والعبير
وفرحتنا فيه شوف الابو
اللي فلا مثله نظير
والحين مصروفكم صبح
في حساب بالبنك الشهير
ومصروفنا اشوية قروش
ويجيبوا كل ما نشتهيهه
ونذكر زمان يا آه يا حسره عليه
البيت كان فرحه وسعد
والاخوه عونه والسند وقلوبهم قلب ابتهج
اقلوبهم قلب ابمحبه انولد
نبضه تحسه فيه العطاء
والايدي اتلاقيها يد
وحده تحس فيها الثبات
و الحين يا كثر العدد
والأجهزه عز ودلال
والفكر شارد والجسد
سمحوا لي عنكم قلت شي
عندكم يخليني نكد
لكن عزاي لمقارنه
واحد بقى واحد شرد واحد استمتع بالحديث
واحد يقول ويش له بعد خلي الجميع ابيفرحوا
ويعيشوا عيشتهم سعد
وخلك وماضيك القديم
لا تكون علينا كالأسد
وانا اقول الف الصلاة على النبي
ويا بخت من ربه حمد وما ترتضوه مني خذوه
حتى نكون اليد بيد
واللي عجبكم اقبلوه
وان ما عجبكم فكروا فيه
ونذكر زمان يا آه يا حسره عليه
تعليقات
إرسال تعليق