شعر والقاء الاديب الاستاذ علي المصطفى
صلوا على الهادي الامين
صلوا عليه يا سامعين
ودي اسولف عن زمن
عشناه و كم به مغرمين
ويكفي يقال هذا زمن الطيبين
عن البراحه وكم لها
في قلوبنا الحب الدفين
ومن تنذكر نشعر بها ريحة عطر
بس تنذكر ترجع بنا اسنين العمر
بس تنذكر نتذكر اسنين الصغر
تحمل من الماضي عبير
يهدينا كل فرحه تسر
وارجع بخطوة فرحتي
صوب البراحه في العصر
أمر على بيوت الفريق
واشعر بهم عمري كبر
مصروفي في جيبي الصغير
ايدي عليه في كل حذر
اوصل براحتنا بحب
والقى الأحبه ويش كثر
شهر ارمضان
والقى الجميع
في حب بالفرحه تبان
هذا يجهز ما يبيع
وهذا يردد في امان
هذا ابتلاقيمه يعيد
ما يمدح البيعه اكيد
والثاني في فرحه يزيد
يهدي الزلابيه شي فريد
بالشيره مع شكله العجيب
و تهتف في سرك يا الحبيب
اه يا ارمضان اه يا ارمضان
لولاك كان لي فيه نصيب
لكن تردد في أمل يحمل صبر
بعد الاذان يبقى تفاهمنا قريب
والخنفروش في ريحته
اتخلي من مر يستجيب
بياعه يهتف في فرح
بعد الاذان أكله يطيب
هذي براحتنا عجب
فيها الخلال فيها الرطب
فيها اللبن فيها الحليب
من شكله توه انحلب
فيها الجميع في كل فرح
والكل مشغول في طلب
هذا طلب من زوجته
وهذا من اخته احبيبته
وهذا من امه و خالته
وهذا ينقي لجدته
حتى الصغار في كل فرح
كل واحد ايشوف طلبته
هذا ينقي من حلاوه عجبته
او من علوج اللي تجذبه صورته
حتى يحطهم في فرح بعد الصلاه
وبعد الفطور مع صحبته
وجلستهم اتكون ابفرح
وما ينسوا ربعه جلسته
ونلقى البضايع اشكثر
اللي بتبهح كل نظر
حتى اللعب
في امكاسر البيض يجذبك
لعبه عجب
وتشوف تحدي يبهرك
هذا يقول عطني اجرب بيضتك
والثاني ايقول له بعد خذ راحتك
واعطيني مثلك بيضتك
كل واحد يضربها على
أسنانه في خفه ولا
يتعارضوا في ذي الشروط
وبعده ولا في مشكله
يبدى اللعب
واللي يفوز يرجع الى بيتهم سعيد
حامل في ايده بيض كثير
وبفرحه إيقدمه بإيد
يعطيه لأمه وتخلطه ويا الطحين
تعمل به اعقيلي له ريحه
كم يشهي الصايمين
و بعد الفطور اطيب حلا
ونعجز نوصفه اجمعين
هذي براحتنا و براحتنا مثل
إمجمع تجاري
عشنا شفناه من قبل
الناس تنتج والجميع عندهم عمل
وما حد بيعرف للخمول
وما حد بيعرف للكسل
هذي براحتنا الجميله
يا ذكرها ما يمل
وبعض البراحات تلتقي لمه وحضور
يتجمعوا فيها الجميع لمه وما فيها شرور
يبدى اللعب بهجه وسعادة وبتنافس وبسرور
اهني جماعه يلعبوا (الهول) ابفرح
واهني جماعه يلعبوا (الخطه) ابمرح
واهني شراع العود و لا تعرف مزح
إلا تنافس والتنافس منفتح
العاب حلوه وفيها قوى
والجميع يلعبها سلوى
ومن يفوز يصبح مميز
والجميع في اسمه يعتز
كل براحاتنا محبه
نجتمع فيها بطيبه
وتلقى البنات اصغيرين ابيلعبون
ها الالف لعبه واللعب يا زينا
والله تحقرص مع تمقرص
لعبه كم ترضينا
وتيله ودوامه وطنقور
آه يبه علينا
العاب تبهج في الفرح تبقينا
العاب حلوه وكم بها ربينا
وما ننسى لعبه امسليه
حزز حزز وازينا
وفي الختام
نهدي الى الهادي الصلاه
وفي الختام
عيدوا معي الف الصلاه
وللجميع اجمل تحية
وللجميع ليله هنيه
تعليقات
إرسال تعليق